ယူအီးအက်ဖ်အေ အဆင့် သတ်မှတ်ချက်မှာ အာဆင်နယ် အသင်းကို ကျော်တက် နိုင်တော့မယ့် တော့တင်ဟမ်

မြောက်လန်ဒန်က အနီလား အဖြူလား ဆိုတဲ့ ဆွေးနွေး ငြင်းခုံမှုတွေဟာ တော့တင်ဟမ် အသင်းဘက်ကို ပိုပြီး အလေးသာ သွားဖို့ ရှိနေပါတယ် ။ အကြောင်းကတော့ တော့တင်ဟမ် အသင်းဟာ ယူအီးအက်ဖ်အေ ကလပ် အသင်း အဆင့် သတ်မှတ်ချက်မှာ အာဆင်နယ် အသင်းကို ကျော်တက် နိုင်တော့မှာကြောင့်ပါ ။

အာဆင်နယ် အသင်းဟာ ပြီးခဲ့တဲ့ ရာသီက အဆင့် ၈ နေရာမှာ ရပ်တည် နိုင်ခဲ့ပြီး နှစ်ပေါင်း ၂၅ နှစ် အတွင်း ပထမဆုံး အကြိမ် ဥရောပ ပြိုင်ပွဲ ကစားခွင့်နဲ့ လွဲချော် ခဲ့ရပါတယ် ။ တော့တင်ဟမ် အသင်းကတော့ အာဆင်နယ် အထက်မှာ ရပ်တည် နိုင်ခဲ့ပြီး ပြိုင်ပွဲ အသစ် ဖြစ်တဲ့ ယူအီးအက်ဖ်အေ ကွန်ဖရန့်လိဂ် ကို ကစားခွင့် ရရှိ ခဲ့ပါတယ် ။

တော့တင်ဟမ် အသင်းဟာ ကွန်ဖရန့်လိဂ် အုပ်စု အဆင့်မှာ ရန်းနက်စ် ၊ ဗွီတက်ဆီ နဲ့ NS Mura တို့နဲ့ ကစားရမှာ ဖြစ်ပြီး ရမှတ်တွေသာ ရယူ နိုင်ပါက ယူအီးအက်ဖ်အေ အဆင့် သတ်မှတ်ချက်မှာ ခါးသီးပြိုင်ဘက် အာဆင်နယ် အသင်းကို ကျော်တက် နိုင်တော့မှာပါ ။

ယူအီးအက်ဖ်​အေ ရဲ့ ကလပ် အသင်း အဆင့်သတ်မှတ်ချက်ဟာ ပြီးခဲ့တဲ့ ၅ နှစ်အတွင်း အသင်းတွေရဲ့ ရလဒ်ပေါ် မူတည်ပြီး တွက်ချက်တာ ဖြစ်ပါတယ် ။ လက်ရှိ အချိန်မှာ အာဆင်နယ် က အဆင့် ၁၂ ၊ စပါး က အဆင့် ၁၃ မှာ ရပ်တည် နေပါတယ် ။

အာဆင်နယ် အသင်းဟာ လက်ရှိမှာ အမှတ် ၈၀ နဲ့ တော့တင်ဟမ် (၇၈ မှတ် ) ကို အသာရနေပေမယ့် အာဆင်နယ် က ဒီရာသီ ဥရောပ ပြိုင်ပွဲ ကစားခွင့် မရတာကြောင့် တော့တင်ဟမ် အသင်း ရဲ့ ကျော်တက်ခြင်းကို ခံရတော့မှာပါ ။

ယူအီးအက်ဖ်အေ ကလပ် အသင်း အဆင့်သတ်မှတ်ချက်မှာ နိုင်ပွဲ တစ်ပွဲ အတွက် အမှတ် ၂ မှတ် ၊ သရေပွဲအတွက် ၁ မှတ် သတ်မှတ်ထားပြီး အဆင့်တစ်ဆင့်ကို ကျော်ဖြတ်နိုင်ပါက bonus အမှတ် ထည့်ပေါင်း ပေးသွားဦးမှာပါ ။

ဒါကြောင့် တော့တင်ဟမ် အသင်းဟာ အာဆင်နယ် အသင်း အထက်မှာ ရပ်တည် နိုင်ဖို့ သေချာသလောက် ရှိနေပါတယ် ။ တော့တင်ဟမ် အသင်းဟာ ၁၉၉၁-၉၂ နောက်ပိုင်း ပထမဆုံးအကြိမ် ယူအီးအက်ဖ်အေ အဆင့် သတ်မှတ်ချက်တွင် အာဆင်နယ် အထက်မှာ ရပ်တည်နိုင်မှာလည်း ဖြစ်ပါတယ် ။

ယူအီးအက်ဖ်အေ ရဲ့ ကလပ် အသင်း အဆင့်သတ်မှတ်ချက်မှာ ထိပ်ဆုံး နေရာမှာ ရှိနေတဲ့ အသင်းကတော့ ဘိုင်ယန်မြူးနစ် အသင်း ဖြစ်ပြီး ၊ သူ့နောက်မှာ မန်စီးတီး ၊ လီဗာပူး ၊ ဘာစီလိုနာ နဲ့ ချဲလ်ဆီး တို့က အစဉ်လိုက် ရှိနေပါတယ် ။

SM